Pambıq sahələrindən bol məhsul gözlənilir.
Beyləqan rayonunda cari ildə 8550 hektar sahədə pambıq əkilmişdir. Bunun 5400 hektarı “MKT” İK MMC-nin Beyləqan filialı ilə, 2440 hektarı “CTS AQRO” MMC-i ilə mülkiyyətçilər arasında bağlanmış müqavilələr, 710 hektarı isə fərdi qaydada mülkiyyətçilər və fermerlər tərəfindən əkilmiş sahələr təşkil edir.
Pambıq sahələrinə baxış keçirilərkən müəyyən olunur ki, yüksək və sabit məhsul əldə etmək üçün əkin sahələrində aqrotexniki becərilmə qaydalarına ardıcıl və düzgün əməl olunmuş, cərgələrarası becərmələr, alaq otlarına və zərərvericilərə qarşı kimyəvi mübarizə tədbirləri vaxtında aparılmış, bitkilər tələbata uyğun optimal müddət də mineral gübrə və suvarma suyu ilə təmin edilmiş, məhsuldarlığı artırmaq məqsədi ilə bitkilərin boyatma prosesini məhdudlaşdıran kimyəvi ucvurma əməliyyatı həyata keçirilmişdir.
Hazırda sahələrdə istehsalçılar tərəfindən son becərmə işləri aparılır, vegetasiya suvarmaları davam etdirilir, məhsul yığımına hazırlıq üçün sahələr alaq otlarından bir daha təmizlənir, sahə kənarları hamarlanır və digər zəruri aqrotexniki və təşkilati tədbirlər görülür.
Yerinə yetirilmiş işlər deməyə əsas verir ki, 2017-ci təsərrüfat ilində Beyləqan rayonunda pambıqçılıqdan bol məhsul gözlənilir.
