Beyləqanda 21 fevral-Beynəlxalq Ana Dili Gününə həsr olunmuş tədbir keçirilib.
21 fevral 2025 | 13:00
Bu gün Beyləqan Rayon İcra Hakimiyyətinin təşkilatçılığı ilə 21 Fevral-Beynəlxalq Ana Dili Gününə həsr olunmuş tədbir keçirilib.
İcra hakimiyyətinin inzibati binasında keçirilən tədbirdə Beyləqan Rayon İcra Hakimiyyətinin başçısı Əziz Əzizov, YAP Beyləqan rayon təşkilatının sədri Müşfiq Səfərov, RİHBA-nın əməkdaşları, rayonun idarə, müəssisə və təşkilat nümayəndələri iştirak ediblər.
Əvvəlcə 21 Fevral-Ana Dili Gününə həsr olunmuş “Ana dilinin inkişafında Heydər Əliyevin rolu” mövzusunda videoçarx nümayiş olunub.
Beyləqan Rayon İcra Hakimiyyətinin başçısı Əziz Əziziv tədbiri giriş nitqi ilə açaraq Beynəlxalq Ana Dili Gününün yaranma tarixindən, bu günün əhəmiyyətindən danışıb.
Əziz Əzizov ana dilimizin qədimliyindən və zənginliyindən söhbət açıb, milli dəyərlərimizlə yanaşı ana dilimizin gözəlliyinin, saflığının qorunmasının və inkişaf etdirilməsinin vacibliyini vurğulayıb. Rayon rəhbəri Azərbaycan dilinin həm ümumxalq dili, həm də dövlət dili kimi inkişafında Ulu Öndər Heydər Əliyev və onun laiqli davamçısı Prezident İlham Əliyevin misilsiz xidmətlərindən, ölkəmizdə dil quruculuğu sahəsində qəbul edilən Fərman və Sərəncamların əhəmiyyətindən danışıb.
Tədbirdə çıxış edən rayon Ağsaqqallar Şurasının sədri Etibar İmanov, Yuxarı Aran qəsəbə tam orta məktəbinin direktoru, Azərbaycan dili və ədəbiyyat müəllimi Sahilə Fərmanova və Birinci Şahsevən kənd 2 saylı tam orta məktəbin Azərbaycan dil və ədəbiyyat müəllimi Rəşidə Allahverdiyeva Azərbaycan dilinin keçdiyi tarixi inkişaf prosesinə nəzər salıb, onun zənginliyindən danışıblar.
Tədbirdə həmçinin Prezident cənab İlham Əliyevin 2013-cü il 9 aprel tarixli 2837 nömrəli Sərəncamı ilə təsdiq olunmuş "Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı"nın mühüm əhəmiyyəti diqqətə çatdırılıb, dövlət idarəçiliyində, mediada Azərbaycan ədəbi dilinin düzgün tətbiq olunmasının vacibliyi vurğulanıb.
Keçidlər
