Beyləqanda ali təhsil müəssisələrinə qəbul imtahanında yüksək bal toplayan məzunlarla görüş keçirildi.
10 sentyabr 2024 | 15:59
Sentyabrın 10-da Beyləqan Rayon İcra Hakimiyyətinin təşkilatçılığı ilə 2024/2025-cü tədris ili üçün DİM tərəfindən keçirilən qəbul imtahanlarında 550-700 bal toplayaraq ali təhsil müəssisələrinə qəbul olmuş rayon məktəblərinin məzunları ilə görüş keçirilib.
Görüşdə Beyləqan Rayon İcra Hakimiyyətinin başçısı Əziz Əzizov, YAP Beyləqan rayon Təşkilatının sədri Müşfiq Səfərov, rayon Polis Şöbəsinin rəisi Ceyhun Qurbanov, rayon Məhkəməsinin sədri Ramiz Nurullayev, DTX-nin Beyləqan rayon şöbəsinin rəisi Vidadi Qurbanov, rayonun məktəb direktorları, qəbul imtahanlarında yüksək nəticə göstərmiş məzunlar, rayonun idarə, müəssisə və təşkilatlarının rəhbərləri, şəhid ailələri iştirak ediblər.
Mədəniyyət və İstirahət Parkında keçirilən tədbir Azərbaycan Respublikasının Dövlət Himni səsləndirilməsi və Ulu Öndər Heydər Əliyevin və şəhidlərin əziz xatirəsinin bir dəqiqəlik sükutla yad edilməsi ilə açıq elan olunub.
Rayon İcra Hakimiyyətinin başçısı Əziz Əzizov tədbiri giriş sözü ilə açaraq bütün məzunları təbrik edib, Prezident İlham Əliyevin və Birinci Vitse-Prezident Mehriban xanım Əliyevanın göstərdiyi diqqət və qayğı hesabına təhsil sahəsində görülən işlər, qarşıya qoyulan məqsədlər, həyata keçirilən ardıcıl və davamlı tədbirlərdən, Azərbaycanda, o cümlədən rayonumuzda son illərdə elmin və təhsilin inkişafında qazanılan uğurlardan danışmışdır.
Əziz Əzizov qeyd edib ki, ötən tədris ilində Beyləqan rayonu üzrə 2023-2024-cü tədris ilinin tam orta təhsil üzrə məzunlarından 30 nəfər 550-700 bal arası bal toplamışdır. Həmçinin, çox sevindirici haldır ki, ali təhsil müəssisəinə qəbul olunan məzunların arasında Vətən müharibəsi şəhidi İmran Məmmədlinin oğlu Vüsal Məmmədli də var.
RİH başçısı məzunları yeni təhsil ocaqlarında aldıqları biliklərlə gələcəkdə ölkəmizin həyatında fəal rol oynamağa, ölkəmizin hərtərəfli inkişafına öz töhfələrini verməyə çağırıb.
Daha sonra ali təhsil müəssisələrinə qəbul imtahanında yüksək nəticə göstərmiş 32 nəfər məzuna, o cümlədən Vətən müharibəsi şəhidi Elyar Mirzəyevin qızı, Futbol üzrə ikiqat Azərbaycan çempionu Xanım Mirzəzadə və şəhid İmran Məmmədlinin oğlu, ali təhsil müəssisəsinə qəbul olmuş Vüsal Məmmədliyə Rayon İcra Hakimiyyəti başçısının Fəxri Fərmanları və qiymətli hədiyyələri təqdim olunub. Tədbirdə həmçinin təhsil sahəsində səmərəli fəaliyyətinə, rayonun ictimai-siyasi həyatında fəal iştirakına görə 4 məktəb direktoru da RİH başçısının Fəxri Fərmanları ilə təltif olunub.
Tədbirdə çıxış edən YAP Beyləqan rayon təşkilatının sədri Müşfiq Səfərov, Təhsil sektorunun müdiri Elvin Abbasov, Azərbaycan Respublikasının Prezidenti tərəfindən “Tərəqqi” medalı ilə təltif olunmuş 1-ci Şahsevən kənd 2 nömrəli tam orta məktəbin Azərbaycan dili və ədəbiyyat müəllimi Rəşidə Allahverdiyeva tələbə adını qazanan bütün məzunları təbrik edərək onlara uğurlar arzulayıblar. Diqqətə çatdırıblar ki, ölkə başçımız cənab İlham Əliyevin rəhbərliyi ilə ölkəmizdə təhsil sahəsində həyata keçirilən islahatlar gəncləri yüksək təhsil almağa və gələcəkdə dövlətimizə və xalqımıza layiqli xidmət göstərməyə ruhlandırır.
Tədbirdə rayon üzrə ən yüksək bal-694 bal toplamış tələbəmiz, Kəbirli kənd M.Fərzəliyev adına orta məktəbin məzunu Pərviz Səmədov, rayon üzrə 2-ci yüksək bal - 672 bal toplamış 1-ci Aşıqlı kənd R.Həsənov adına tam orta məktəbin məzunu Cəfərli Maşallah, 2022-ci ildə Respublika Fənn olimpiadasında Azərbaycan dili və ədəbiyyat fənni üzrə final turunda I yerə layiq görülərək qızıl medalla, 2023-cü ildə isə gümüş medalla, 2024-cü ildə yenidən qızıl medalla təltif olunmuş Ə.Əsgərov adına Yuxarı Kəbirli kənd tam orta məktəbinin məzunu Fidan Qasımova, qəbul imtahanında 625 bal toplamış məzunumuz Məmmədli Zəkanın atası Qarabağ qazisi Vüqar Məmmədov və 672 bal toplamış məzunumuz Cəfərli Maşallahın atası Aqil Cəfərov da çıxış edərək yüksək bal toplamış məzunları və uğurlarında əməyi olan hər kəsi təbrik edib, tədbirin təşkilatçılarına öz minnətdarlıqlarını bildiriblər.
Sonda rayon Mədəniyyət nümayəndəliyi tərəfindən hazırlanan konsert proqramı təqdim olunub.
Keçidlər
