Qəhrəmanlı qəsəbəsində antiterror əməliyyatlarında şəhid olan Rüstəmli Bəhruz Malik oğlunun məzarı ziyarət olundu.
19 sentyabr 2024 | 14:56
Bu gün Qəhrəmanlı qəsəbəsində antiterror əməliyyatlarında şəhid olan hərbi qulluqçumuz Çavuş Rüstəmli Bəhruz Malik oğlunun və Vətən Müharibəsi şəhidlərinin məzarları ziyarət olunub.
Ziyarətdə Beyləqan Rayon İcra Hakimiyyətinin başçısı Əziz Əzizov, Beyləqan rayon prokuroru Ramazan Hadıyev, rayon Polis şöbəsinin rəisi Ceyhun Qurbanov, rayon Məhkəməsinin sədri Ramiz Nurullayev, DTX-nın Beyləqan rayon şöbəsinin rəisi Vidadi Qurbanov, Səfərbərlik və Hərbi Xidmətə Çağırış üzrə Dövlət Xidmətinin Beyləqan Rayon Şöbəsinin rəisi Bəxtiyar Hümbətov, RİH başçısı aparatının nümayəndələri, rayonun idarə, müəssisə və təşkilat rəhbərləri, şəhidlərin yaxınları iştirak ediblər. Ziyarətçilər şəhidlərin məzarlarına tər gül dəstələri düzüb, ruhlarına dualar oxuyaraq xatirələrini ehtiramla yad ediblər.
Beyləqan Rayon İcra Hakimiyyətinin başçısı şəhid ailələri və onların yaxınlarına başsağlığı verib. Rayon rəhbəri bildirib ki, şəhidlərimiz Vətən Müharibəsi və antiterror əməliyyatları zamanı qəhrəmanlıq göstərərək adlarını xalqımızın, doğma beyləqanlıların qəlbinə əbədi həkk etdilər.
Qeyd edək ki, Rüstəmli Bəhruz Malik oğlu 1998-ci il oktyabr ayının 10-da Beyləqan rayonu Qəhrəmanlı qəsəbəsində anadan olmuşdur.
Azərbaycan Silahlı Qüvvələrinin hərbi qulluqçusu Bəhruz Rüstəmli 44 günlük Vətən Müharibəsində də iştirak etmiş və “Füzulinin azad olunmasına görə”, “Xocavəndin azad olunmasına görə”, “İgidliyə görə”, “Vətən müharibəsi iştirakçısı” medalları ilə təltif edilmişdir.
Bəhruz Rüstəmli Azərbaycan Respublikasının Silahlı Qüvvələri tərəfindən 20 sentyabr 2023-cü il tarixində həyata keçirilmiş uğurlu lokal antiterror tədbirləri zamanı Xocalı rayonu Dağdağan kəndi istiqamətində gedən döyüşlərdə şəhid olmuşdur.
Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərmiş, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqlənmiş Azərbaycan Respublikası Silahlı Qüvvələrinin hərbi qulluqçusu Bəhruz Rüstəmli Azərbaycan Respublikasının Prezidenti İlham Əliyevin müvafiq Sərəncamlarına əsasən "Vətən uğrunda” medalı və 3-cü dərəcəli “Vətənə xidmətə görə” ordeni ilə təltif edilmişdir.
Keçidlər
